РОЗИ ҶОВИДОНҲО

Чӣ хоҳӣ, аз замину осмонҳо,

Ки дорандат абадноми замонҳо?!

Бале, ҷовид шудан сода-ст, танҳо

Бикун коре, ки карда ҷовидонҳо.

 ПАЙК

 Чаро, эй мурғ, беҳангом хондӣ,

Суруди хосро бар ом хондӣ.

Ба ҳар ваҷҳе саноят бод, эй пайк,

Ки вақти шом ту аз бом хондӣ.

БИБОРӢ, БОР…

 Сафо мебоядат чун осмонҳо,

Ки софӣ оядат бар ҷисму ҷонҳо.

Чӣ абрӣ, ки чакишҳоят ҳисобист,

Биборӣ, рез, чун аз новдонҳо.

ҲАМСУҲБАТИ ТАНҲОӢ

Чу аз тифлӣ дили шайдоиям буд,

Навои ишқи ту лолоиям буд.

Набудам ҳеҷ гаҳ танҳову бекас,

Ғамат ҳамсуҳбати танҳоиям буд.